|
华亭路时尚传奇 原创：沈琦华 来源：夜光杯2020.1.16 上海话改写：郭莉 朗读：俞镝 推荐：丁迪蒙 点击下方收听音频，时长8分39秒。 廿多年呒没来过上海个美国爷叔安东尼，一下飞机，就叫我陪伊去购物。迭个勒勒上世纪九十年代，频繁穿梭于上海搭仔洛杉矶个美国爷叔，自封自家是中国通，还夸口讲，尽管伊自家年纪大了，但是仍旧经受得起长途旅行个煎熬，一心想个就是要去兜兜伊心心念念勿肯忘记个购物天堂——华亭路。我搭伊讲，上海现在发展速度超快，买物事根本勿要出门，坐勒屋里向键盘一敲，手机浪账单一付，快递自会送货上门。侬还想啥个“华亭路服装市场”？省省伐！啥辰光个事体了，老早老早拆脱了。 华亭路，对于现在年轻一代个上海人来讲，还真是好算是上世纪个传奇了。华亭路勿长，南面头是淮海中路，北面头到长乐路。伊是1919年到1921年辰光修个路，从前叫“麦阳路”，1943年改了名字叫“华亭路”。1984年，上海第一只个体服装市场，就是勒勒华亭路诞生个。刚刚开始辰光只有五十多只摊位，只占淮海中路到延庆路搿搭一段个半条华亭路。 要讲上海人穿衣之道，从前总归是冬天着棉，夏天着麻，重质勿重量，一年到头也翻勿出几件花样来。神智无知混到了上世纪八十年代，勒陌生看见外头个花花世界，人家一个个勿是衣冠楚楚，就是花枝招展。乃末华亭路个体服装摊头个小老板坐勿牢了，伊拉用足心思，绞尽脑汁，拿好仔欧美个、日本个，还有阿拉自家港台地区杂志浪向个最新时装款式，要么南下广州去进货，要么索介自选面料，自行设计，自家动手来做。据说华亭路服装摊头流行风潮个审美水平，是可以跟世界服饰潮流同步个。华亭路一记头就变成了上海年轻人“领市面”个潮流源头，名声大振。华亭路服装摊位越来越多，顶顶结棍个辰光，从淮海中路到长乐路，两边排满了400多只摊位，每日天，每一只摊位前头，顾客侪轧足输赢。 新经济时代，人靠衣装，衣靠商标，一件件“阿玛尼”咾啥从头到脚套勒身浪，十足个名牌，打造出成功人士个标识。再加上世俗势利，有种人看见侬衣着名牌，马上弯腰就拜。所以为了显得自家有身份，交关小白领勿得勿也去搭自家买一套国际名牌，充充门面壮壮胆，赛过就是老话讲个：“勿怕屋里火烧，就怕出门跌跤。”搿能一来，会赚铜钿个小老板从迭个里向发现了商机，一大批高仿名牌也就混到了华亭路市场。伊歇辰光，交交关关老外侪欢喜兜华亭路，淘便宜货。管伊啥个真货假货，管伊啥个鱼龙混杂！搿位美国个安东尼爷叔就是其中之一。老实讲，当时华亭路个生财之道，也代表了伊歇辰光上海特有个生活态度。 当然，多少年过去，社会发展了，消费理念更新了，市场法制也完善了。2000年，华亭路服装市场整体拆迁，搿条小马路终于恢复了几十年前像一池春水恁介个安静。 现在，安东尼跟我两介头，走勒又寂寞又安静个华亭路浪，路个两边是各种地中海式风格个小洋房。四坡瓦顶、房前半圆形个散廊、灰色或者是棕色个拉毛水泥墙面、洋房前头有高高个竹篱笆墙。迭个是半遮半掩当中反映出来个岁月沧桑，更让人感受到了早年华亭路拨大家忽视了个、搿种与生俱来个高雅气质。美国爷叔安东尼讲，如今再看走勒华亭路浪个上海姑娘，衣着实在是有了品位。伊还讲了一句王尔德著作里向个经典句子：人生在世，成勿了艺术品，就应该着一身艺术品。 大概也是为了承袭当年服装市场个遗韵吧，华亭路个一眼洋房里向也开出了几家服装店，主要是以私人定制来吸引顾客。安东尼勒勒其中一家店里，看中了几件丝绸衬衫，选好料作，伊突然问店老板：“㑚会得勒勒我个衣裳浪向钉一只啥个商标呢？就像啥个阿玛尼之类个牌子？”店老板笑了，伊拿出一张白纸头对安东尼讲：“侬就像电影明星搿能签只名好唻，阿拉可以拿侬个签名，搭侬绣勒衣裳个袖口浪向！” |
|
|
