 沪语朗读：吴椿华 朗读者 做蛋饺 来源：看懂上海 上海话改写：郭莉 朗读：吴椿华 推荐：丁迪蒙 蛋饺颜色金黄，样子像只“金元宝”，味道又邪气鲜美，所以过年辰光上海人家侪要吃蛋饺个，好吃又吉祥。对于上海人家来讲，年三十夜里，家家户户个年夜饭，蛋饺是一定要自家屋里做个。 小辰光，轧勒灶披间炉子边头，盯牢看长辈哪能做蛋饺：先拿一把钢种勺子烧热了，用一块猪油勒勺子浪刮一圈，再臽一调羹打好个蛋液进去，乃末捏牢勺子，轻轻叫一转，蛋液就顺牢勺子边铺出一张圆圆个蛋皮来，蛋皮要大小适中，厚薄均匀，趁伊还呒没完全凝固，搛一小筷子调好味道个肉酱，放勒蛋皮当中，齐巧蛋皮边凝固得恰到好处了，用筷子小小心心挑起一边蛋皮，慢慢叫掀（xiao）过去，正好盖牢肉酱心子，两边合拢，边浪再轻轻叫揿一揿，蛋饺就成形了。 家家户户做蛋饺其实侪老讲究、老精致个。鸡蛋一定要用最新鲜个，肉酱也一定要自家手工一刀刀斩出来，还要必备一块猪油。做个过程也邪气看得出功夫深浅。迭个就勿是几句言话讲讲介简单个了。 刚刚做好个蛋饺，蛋皮金黄带眼焦油颜色，一只只看上去乖巧饱满，马上就叫侬食指大动，小囡们勒勒边头更是看得涎唾水溚溚渧，不过搿歇侬还要熬牢，迭恁个蛋饺只不过是半成品，要吃，是还要再加工个。 顶家常个做法是，炖一镬子高汤，里向放蛋饺、肉圆咾啥荤个；再放菠菜线粉咾啥素个，一只大砂锅热彤彤端上年夜饭大台子当中，只看见又是金黄又是碧绿，色香味俱全，一片喜气洋洋。 年年吃年年看，上海小囡长到十五六岁辰光，自然而然就传承了迭只手艺，拿起汤勺，三弄两弄就会做了。 平常日脚，蛋饺可以到菜场买现成个，年夜饭个蛋饺是一定要自家屋里亲手做个，既有种闹猛勒里向，也讨只好口彩。迭个是老一代人传下来个手艺，将来还要传拨孙囡外孙囡，是要一代一代传下去个。 精彩回放：
|
|
|
来自： 渺渺m69vnzsah9 > 《待分类》
