沪语朗读:周红缨 ![](http://image109.360doc.com/DownloadImg/2020/12/2911/211589458_1_20201229113604916_wm)
朗读者 文章来源:新民晚报 作者:章慧敏 沪语改写、朗读:周红缨 上个世纪七八十年代,上海个住房困难可能勒全国勿是第一也是第二了。埃个辰光个上海人常常拨上海以外个人嘲笑精于算计,原因之一大概就是勒蜗居当中照样可以“螺蛳壳里做道场”伐?虽然当年几乎呒没房屋买卖搿种事体,但是改善居住条件又是交关人家个“刚性需求”,于是,调房子就成为了一种途径。 阿拉屋里向也是搿支调房大军当中个一员,只不过房子看了交交关,成功率却是零。阿拉住勒愚园路靠近江苏路,属于新里结构。听父母说搿房子是伊拉用几条“小黄鱼”问二房东“顶进”来个。勒搿幢三层个楼房里向,二房东住勒二楼三楼,阿拉屋里住勒一楼。前后两间一共40个平方米,再加上底楼个优势:房子前头有只小花园,后头有只小天井,一家3口住得还是蛮宽敞个。 阿拉搭仔二房东相安无事个住了十几年,呒没想到就勒某一天个下半天,楼梯突然“噼里啪啦”地响个勿停,大门外头多了交交关关看闹猛个邻居,走廊里向呢,还堆满了旧家生搭仔包袱,还有好几个陌生人上上下下个勒海搬物事……邻居告诉我二楼个前房间拨人家抢脱了。搿场风波还呒没消停几天,后房间又拨另一家人家占领了,整个二楼一记头多出来11个大人搭仔小囡,原来阿拉两家人家佮用个卫生间,现在是整天散发出一股味道,而厨房间里也拨塞进了煤球炉子。 居住格局拨破坏脱了,阿拉爷娘开始有了调个环境个想法。有段辰光,阿拉吃过晚饭就开始行动:我姆妈勒煤气灶浪捣糨糊,我拿“蓝印纸”覆盖勒32开大小个纸头浪抄写自家个情况搭仔调房子个要求,然后爸爸踏仔个脚踏车带勒我趁牢天色黑,勒电线木头浪贴调房个广告,顺带便也看看别人家个招贴,有合适个房源就马上拿联系方式抄下来。不过,招贴个方法邪气短命个,隔天再去看,要么拨覆盖脱了,要么拨扯脱了,挨下去又是新一轮个捣糨糊、抄写、张贴,周而复始。相比之下,每个礼拜天复兴中路浪向个黑石公寓大门口有个自发个换房市场,有需求个侪会得去伊面寻找机会,命中率也蛮高个。搿种情景有点像现在人民公园个“相亲角”,大家面对面个谈条件,要比勒电线木头浪贴广告来得直接,谈得拢个当场就可以到对方个屋里去看房子了。调房个过程可以讲是艰难又曲折,当时有句笑话讲:“调房子比寻对象难。”寻对象是一对一、侬情我愿个事情,而调房子呢,面对个是双方家庭个全体成员,只要有1个人投反对票就会拨全盘否定个。阿拉屋里向曾经搭中山公园附近个一家人家谈好了调房子个事体,啥人晓得,半路里杀出个程咬金,迭家人家个第二个儿子死活勿同意,搿让两家人家个努力侪打了水漂。后来再晓得,伊拉屋里有只3个平方米大小个大壁橱,单独让搿第二个儿子搭了床铺个,要是搬到阿拉屋里,伊就呒没迭个特权了。还有一次,阿拉搭兴国路上个一家人家兴冲冲个跑到房管所办理调房手续,工作人员讲,迭个地段属于特级地区,勿是随便啥人想进就能进个。当时阿拉爸爸是拨审查个对象,是跨勿进埃个“门槛”个。尽管呒没调成功房子,但是回忆起当年个故事还是邪气有回味个。上海人勒调房个过程当中个智慧绝对是叫人佩服,“三调”“四调”勿稀奇,我甚至于听爷娘讲,有人因为呒没房子结婚,硬劲靠“七调”再有了婚房。想想也是,光是七家人家来来回回个看房,搿个工程就邪气复杂,搿能活络个脑子让我联想起水里向游刃有余个各种鱼类。调房子,是当年民间自发改善住房个一种办法,假使今朝能够赋予伊时代个特色,除脱买房搭仔租房,迭个也勿失为一种实用个改善居住个方法,迭个空间也许也是老大个。图片来自网络
上海言话叙身边事体 往期回顾: 会叫人个小囡老佮算
看淡一切,快乐个活勒海
小草在歌唱
啥人勒敲门
麻球
茅屋为秋风所破歌
“上海言话讲起来”旨在传播沪语,若有不当之处,恳请留言指正。 感谢您的支持转发,欢迎关注本公众号
|