 May. 31 2018 by: 唐位位  迭个辰光，马小飞并勿晓得死人是拿来吓活人个。伊欢喜赤佬故事。夜里听。玉川阿叔个掼摔跤朋友替生，五官长得像《金光大道》中个高大全，面孔煞白，单薄个双眼皮眼睛醉醺醺个，身架文弱，讲故事蛮扎劲，以下是伊一口咬定亲身经历个事体： “旧年九月份。我吃了夜饭到江苏路朋友屋里打40分，打到12点多钟出来，想抄近路往武定路菜场穿过来，弯到上影乐团门口，听到女人哭，我觉着牵肠挂肚一样难过，路灯敲得粉粉碎，还好头上有一眼天光，我看到前头小弄堂个转弯角子，一团白影子抖法抖法…… 跑过去一看，一个长头发女人，着仔一件白颜色的确良衬衫，哭，我想迭只女人飞来，比垃三还要垃三，现在马路上有啥人披长头发？我上去搭讪，趁机看看长得哪能，一看，好看是勿要去讲了，面孔上有种讲勿出话勿出个让人难过个味道，勿看还好，一看就想陪伊一道哭。
“伊开口了：侬陪我吃杯咖啡好伐？我讲：介晏了，到啥地方去寻咖啡吃？伊别过身体移到我跟前：到我屋里去。我勿再罗嗦，跟了伊后头。走到小菜场买盆菜个摊头，她停了下来，朝我点点头，我两只脚神智无知就跟牢伊。 “伊，如雪白衫，一荡，'吱嘎’一声，一扇镂空铁门应声而开，阿拉穿过枝叶扶疏个花园，上台阶，穿长廊，电灯一只只，开开又关关。 “伊拿我带进客厅，让我稍坐，自家去烧咖啡，我环顾四周，呒没啥家生，顶顶多个是伊个照片，大大，小小，辣墙壁上朝牢我笑。我坐在八仙桌面对窗帘个一面，伊来了，端牢托盘，拨我一杯咖啡，白瓷咖啡具，细洁光滑，一种久违了个奢侈……伊，慢厾厾燃起一支雪茄烟，开始细讲伊屋里个事体。爷娘阿哥侪拨人家杀脱了，伊孑然一身如漂萍，夜里向睏勿着，梦游一样来到外头，碰着我。伊拿出一副扑克牌要同我白相，兑牌兑了两盘，又收脱了，要我明朝带三个朋友来白相40分，我讲带两个勿是正好嘛，伊摇头道，我看看白相就够了，我蹲了迭只荒园，厌气煞了，就想侬带人来闹猛闹猛……我感动了，答应伊……
“吃好咖啡，想拆尿，伊勿许，伊讲，侬走好了，明朝夜头12点敲过再来，我讲早眼来勿是更加好嘛，伊讲，覅寻事体了，隔壁邻居全是包打听，12点敲过太平一眼。我同意了。 “伊送我出去，别过头，手指头点一点蓝颜色搪瓷门牌上个4，白光快闪，玉凤翩翩……我已经看呆脱了。伊讲，记牢是4号，明朝夜里我门勿锁了，自家推进来，先白相，慢慢交我会得来个…… “第二天，我告三个牌搭子一讲，全蛮好奇，我提醒了一句，介晏去，阿是有眼古怪啊？勿去也罢了。长脚鹭鸶朋友讲，勿碍，四个男人，有啥吓个啦？就去了。 “12点敲过，到了4号门口，门一推就开了，走台阶，穿长廊，开灯关灯……伊勿辣客厅里向，八仙桌浪是昨日夜里个咖啡杯，呒没汏过，香烟缸里挺了半截她吃过个雪茄烟…… “阿拉四介头开局，几盘四十分打下来，长脚讲小便急了，到马桶间拆尿，捻开门把手，就进去了，关门，一歇歇听到拆尿声，响了交关辰光，总算声音停了……大家拿合扑在台子上个牌拿起来，准备继续打，等等长脚勿出来，阿拉辣外头喊，长脚辣里向讲等歇等歇，阿拉只好等，打牌三缺一，阿拉开始谈山海经。全觉着怪，昨日个女人也勿露面，伊拉怀疑我吹牛山，我是百口难辩，相当尴尬。过脱一歇，阿拉去敲马桶间个门。门勿开，长脚来里向喊出来了出来了。阿拉再回到台子浪……
“长脚总算出来了，拿马桶间门关关好。伊头发湿脱了，水一直滴下来，面色阴沉。大家打牌，伊只出牌勿发声音。又有人要去马桶间，长脚伸手拦牢，手冰冰瀴，伊讲让我先去，伊进去了，关门，再也勿肯出来，阿拉喊伊骂伊，敲门，伊一百样勿睬……主人勿出来，又勿敢拿门敲坏脱…… “阿拉越来越觉着勿对哦，窗外，凤尾森森，勿宜出门，厅里，到处是女人个黑白照片，朝牢阿拉笑，阿拉三介头呒没办法了，坐辣海度死日，等天亮…… “鸡叫，天亮了，阿拉勿敢轻举妄动，跑到派出所去讲，民警像老早就晓得一样讲，又是迭家人家啊，喊了三五六个人，到四号里去了，阿拉三介头跟了一道去……开开马桶间个门，长脚头朝下，脚朝上，一根筷子一样，插辣马桶里…… “墙壁上，四张照片，女人，女人个爷娘，阿哥…… “民警讲，介好个花园洋房，假使勿出眼怪事体，老早就住满人了。”
替生个故事啊讲得大家寒毛管根根竖起来，马小飞似懂非懂，只晓得兴奋勿晓得吓……沉默了一歇，玉川拆穿了西洋镜：“虚构，完全是虚构！”旁人便也惊醒了，揭穿了替生个西洋镜…… “我辣此地住了快要一生一世了，有迭牌事体？荒唐！” “侬只小贼，讲穿仔是造出来个，我也服帖你，硬劲要讲是亲身经历个事体！” 玉川阿叔个另外一个朋友，有根，伊拉爷解放前头是踏三轮车个，有根讲了一段伊拉爷碰着个怪事体： 一天夜到，伊拉爷送客人到杨树浦，转来个辰光，车子空脱了，马路上赤佬也没，拿车子踏来飞快。突然有三个人拦牢车子，让伊带一段，问到啥地方去，对方讲勿清爽，只讲顺路带一段，就让伊拉上来了。又问伊阿有香烟，香烟啊，伊拿出一根，一拗四段，自己叼起一段，剩下来个分拨伊拉，大家点旺。继续踏。发觉三介头勿讲闲话，觉着有眼怪，又发觉车子没啥分量，踏来轻快，回头一看，哦，三个人呒没头哦！香烟夹辣手浪向，香烟头突然一红，青烟从上头喷出来……难末吓煞，勿敢再回头，拼命踏，总算踏到市区，回头一看车厢空脱了，地上三截香烟屁股…… 朗读：上海|梧桐雨 编辑：神死恸瞑 本平台暂未开通评论，大家可至吴语学堂微博留言： 新浪微博：吴语学堂微博 |
|
|
