云南楚雄兜一圈  2021年7月6号，大清老早爬起来，四点三刻就要校门口集合。虽然眼闭瞌【目充】，睏昏搭鬼，还朆醒嘞，但兴奋兴奋亇呀！迎嘚晨光一埭朝东，眯脱歇儿么像煞介子也不消几许辰光就到嘚浦东机场。八点钟户荡亇飞机，拉起来一歇儿歇儿就有能俯瞰整座上海城，屋舍俨然，雄伟挺拔！
一路朝西，飞越南方。蓝天白云，美不胜收！终11点钟户荡到达昆明机场。头一趟来云南，充满嘚期待！不过老实讲，望出去亇风景，觉着撘浙江俦错差不多，新鲜感不算强烈。也可能去过新疆之后，塱西域景象亇强烈比照下头，中东部广大地区好像差异性真不大。 导游领伲就近吃嘚顿饭。爿饭店蛮有民族风情，菜蔬也蛮好，我亇战斗力充分发挥！吃罢朝西，直奔楚雄彝族自治州。终三五点钟到亇。座城市蛮清爽，透露出一股彝族风情。不过总亇讲来，千城一面——各地亇城市全差不多，有明显亇民族元素已经算有点特色啧。
我伲住㕇垯云华酒店，塱城市东南角，只位置蛮落乡。安顿好，差不多也吃夜饭啧。里乡有只羊肉汤是鲜透鲜透！我一般不大拍吃头亇，昰趟话也忍不牢拿只菜拍嘚下来！可见㕇我嘴里的确非同一般！ 吃罢朝外兜兜。佷倒覅话啥，昰滩齐夜快蛮瀴亇！亏得我横老活性命包里样样囥好亇，一件袈衫常迱迱背㕇身上亇，正好拿出来一着，但毕竟长裤不会随身带亇，热天色么短脚裤，脚馒头上还是吹得冷飕飕。 朝东一公里户荡有只彝海公园，跑到门口头正好一阵雨，豪髞一次性雨衣垦出来身上一披。早吃罢亇両个是里乡已经出来啧，正好落雨么也赶紧回转啧。我是横一个子落落慆慆继续趤发趤发。
门口头有排彝族风情亇介绍，最吸引我亇是両张扮演动物亇照片，好像是当地亇某种舞蹈嗫仪式。我横最欢喜猪猡嘞就专拣人家扮猪猡亇照片拍。拍好朝里，里乡自然气息浓厚，当中有只湖，边头一绞圈生态步道，地势还有眼高。碰着一只黄伯劳，人跑得近宛也不飞脱，看来人与自然关系和谐。 南门进去，北门出来，拔直朝北，到阳光大道转弯朝西一段，路北横头有一只瑞特商业中心——心联兴购物广场。路大透，但呒得红绿灯，过马路两带边车子惊要当心嘚嘞！佢垯昰个塱，路蛮大、蛮好，但是红绿灯有眼少。乃么大卖场么，全国各地也全差不多，只是换滩场许图个新鲜。
7月7号，上昼横笃笃定定睏得晏点，半上昼把头儿动身朝东，到禄丰县亇恐龙谷参观。昰只位置塱楚雄、昆明两座城市亇半当中厢里，据悉是世界上出土恐龙化石最丰富、最完整、最古老、最原始亇地区之一。里乡亇展品丰富异常，有両块恐龙骨头是大得吓煞人呃！真是大开眼界！
参观好出来，终半下昼把头儿，有両个同事乘车上山泡温泉去啧，其他人等㕇大门口广场边头亇廊棚里自家别相。我是横闲不定亇嘞，饶佷大热天色么啧，照样也要朝外“侦察”。大门㕇垯公园西南角，我出来嘚先朝北跑。喔外头是赞透赞透！上头蓝天白云，下头青山碧野，虽然日头辣辣较，但心情无比舒畅！走到一只宅头，看看阿有上山亇路。宅上人家看见我蛮友善亇，问问信也蛮客气热情亇，一点也不像有警惕性亇。不过路脚跟角落头里场时有狗亇，看见我“喤喤喤喤……”猛謸呃！亏得缚牢㕇塱，辨恁倒真要畀佢“咂嗒”一口！
拔直朝北亇昰只宅跑不通，乃么退转眼朝西面亇伊只宅上去寻上山亇路。条东西路沿塘塰亇，北带边是只潭，对过湖滩边头有両只牛嘞羊，后头亇山势映照㕇湖里，风景如画，像世外桃源一样。就是可惜，点水颜色不灵呀！像煞还稍些有眼臭烘烘，估计点牛涴、羊涴污染亇，可能牛羊密度超过嘚昰只潭亇自净能力。
湖西横头就是还一只宅。不过，离宅角还有百把公尺，就已经听见只狗塱“喤喤喤喤”謸啧！覅冒进，慢慢咬着一口不合算亇。乃么立定，望远镜摸出来嘚密切观察——发现目标！宅角塰墪！还好，缚牢㕇塰！乃么放心托胆继续朝前，结果话喇陌生头謸声四起“喤喤喤喤……”像吃着埋伏一样！乃死！豪髞再用望远镜观察，结果别亇両只全望不着，不晓得缚定亇嗫还是放开亇，覅慢慢跑上去畀佢垯蹿出来吊牢定么乃么死啧！算啧算啧，覅瞎闯，安全第一。
退转，回到南面半当中厢里一只路口塰墪，朝西，有块小高地，沿山脚朝南跑，东带边是一大块南北里长亇田，有両个农民邋做田里，还有両只牛嘞！一幅安宁祥和亇景象。趤发趤发趤到南横头么，前头好像是杭瑞高速拦牢定啧，乃么朝东弯转来，意外亇发现从南面又重新兜到嘚恐龙谷门口。乃么也钻到俦伴墫亇廊棚里，吃冷饮，做游戏！快快活活一下昼！ 7月8号，上昼去太阳历广场，塱楚雄城区西部。只广场主要展示亇是彝族亇历法。当中有一只高台，像天坛恁亇。登高望远，整座城市尽收眼底，视野开阔，美不胜收！点云是永远扮演嘚重要亇脚色。云南云南，来嘚话真亇像专门欣赏云亇！
吃罢饭，大份人回宾馆休息，毕竟热天热色亇。当然总贯也有我伲寔恁一坒想充分利用外出时光亇人。车子塱彝人古镇放伲下来，侦察兵先行探索去啧。我亇任务是——做保镖——一个小矮人保护七个白雪公主。古镇塱城区西北角，大蛮大。不过各块各处古镇景区也全差不多，呒啥多介绍头，至多就是换滩场许体验体验。不过両个阿姊、妹妹倒是觅着嘚好别相场子——汉服馆嗫照相馆，横进去就是换衣裳拍靓照亇。有辰光真蛮佩服女人亇——佢垯可以不断亇换衣裳，换角度，横拍竖拍，化妆可以化畅化畅，以此为乐，乐此不疲，不亦乐乎！对于我伲雄性动物来讲，讴——怪不得人家话念“男人来自火星，女人来自金星”。
我看看佢垯自得其乐要弄畅嘚嘞，店里乡横安全宛亇，伏㕇塰也呒立呒隑喥唏唏亇，乃么“保镖”“玩忽职守”，脚头一歪，自家朝外兜别相去啧。结果话一跑跑得大豁边——我是横也脚轻松，走走走走，朝南跑出嘚古镇，顺嘚永安路朝西，跨过龙川江，沿塘塰抄东南，望准南面座山，看见一条上山路就穿过威楚大道爬上去。
条上山水泥路是抄西北亇，颠头好像是爿单位，还只是山腰，乃么退转来嘚段，看见路南带边有条烂泥小路巉巉恁朝上，但头上有树，边上有草，蛇癞癞，蛮呴势㕇塰，乃么镊嘚根树丫枝做打狗棒，一头掊，一头拷，眼睛四突圞圞观到家，小心翼翼朝上爬，毕竟若然畀蛇啄着一记，嗰真亇不是弄打甏亇事体！
到嘚上头，豁然开朗，原来是一片山腰上亇平地，种亇春熟，边头有只小宅头，住嘚両家人家，安全感“拔喇拔喇”上来。外加令人惊喜亇是——还呒得狗！哈哈！乃么继续草里掊掊敲敲从狭哝哝亇小路里钻过去朝东南方向亇山顶爬。坡度比较平缓，穿过一块坟地就差不多到山顶啧。山顶是一大片松树林，地下落满亇松针。朝北可以望着城市，但是树罅套里望出去嘞视野不开阔。想【目沙】【目沙】看阿有啥新奇亇自然景物，倒也呒啥特别，横就是松树、松树、松树。乃么又原路回转啧。回到上山亇伊条水泥路上，突然发现路边头有棵植物，金黄颜色，像朵花，从来朆看见歇，豪髞摸出手机识别——叫“地涌金莲”。赞亇！今朝开眼界啧！
等回到古镇伊爿拍照店么，両个阿姊嘞妹妹嘞自然——还朆拍好嘞！对于佢垯来讲，昰点辰光哪恁煞念啊？当然，我倒是要坐下来歇一歇，啌一啌啧。 吃夜饭到古镇南部亇伊爿好像叫毛家饭店，大部队也乘嘚大巴来汇合。坐㕇两楼包间朝南正好望着对过亇铁路高架，吃吃夜饭，看看火车。吃好看古镇夜景。像我昰种食仓大亇么，大部队出发嘚我还要搭势码架吃一歇儿嘞！总贯要待肚皮搂饱嘚么跑得动，走得长。等我出去是已经八点钟户荡啧。不过云南毕竟塱西塰交关路嘚嘞，相对于北京、上海来讲轧真是有眼时差亇，故嘞话么话八点钟，实际上也就日光搭火光亇辰光。当然，灯光已经打起来啧，人也明显多起来啧，毕竟热天色夜快头儿还是称心亇。昰个辰光民族风情开始充分展现——广场上巷尽人身着华丽亇民族服饰围成一只大圈子绕嘚篝火邋跳舞，相当富有感染力！整个彝人古镇全人潮涌动，闹热非凡！兜来趤去，浸润于昰种气氛当中，也是一种享受！
透露一个小秘密噢：恁十点钟我伲全已经上车回转啧，还有头先下昼就来亇阿姊嘞妹妹嘞㕇垯照相馆里拍靓照嘞！真亇是呒得任何物事有能攩牢女人拍照亇热情啊！ 7月9号，上昼参观楚雄博物馆。我一直觉着各式各样亇博物馆全是极好亇旅游景点，里乡信息量是大得海海万万！佷若然真亇有心有想伏㕇塰笃笃定定看是一日天也好兜亇。作为一个地方上综合性亇博物馆，楚雄博物馆里自然科学、人文历史也一样不少。当然，顶顶吸引我亇，还是“嘉定乡下老三样”——田鸡、癞团、蝦壳子——亇各种亲亲眷眷，啥中国林蛙、云南臭蛙、宽头短腿蟾、无指盘臭蛙……还有啥狗涴化石、猪牙齿嘞些儿，滑稽透滑稽透！虽然里乡民族风情、革命历史嘞排内容也蛮丰富，但我发现自家还是最最欢喜自然界里伊排物事。
下昼，到西塰郊外亇紫溪山风景区，终一个钟头车程。拥抱大自然，我欢喜！山林里钻钻趤趤，阴凉笃笃，正适意。路边头看见只癞团，看只头型话是像撘伲嘉定看见亇癞团俦不大一样亇，作兴两只品种。山上有両棵老树粗透粗透，一看蛮有年代感。碰着両个当地人不走“寻常路”，背嘚只草篓恁亇物事㕇山坡上采菌菇，朝只家生里张嘚张，红亇、黄亇，倒蛮好看，大丰收！
夜饭像塱边头远不多亇彝伦园吃亇“长街宴”——廊棚里百把只台子一栏排，像条长龙，蛮有意境。横还朆开饭，跑到颠头看风景，正好半山腰，视野开阔，蓝天白云，望出去赞透赞透！觉着到云南来是点云顶顶有看头！不过我伲夜饭倒也不是坐㕇廊棚里亇一字长蛇阵里吃亇，塱边头亇小包间里，横清爽眼，省得人家邋边头跑来跑去。昰顿夜饭我望畅望畅！因为有我最相心亇——虫！邋我嘴里是觉着虫恨不得傍海货也鲜！每只台上一盆虫，一半蚕蛹、一半蚱蜢，畀我一事亨畅，吃得开心得啦！横别人家不大要吃亇，基本全是我亇菜。自家台上吃脱嘚还去隔壁台上盆也抬过来吃，面孔也覅亇！若假不是昰点侥佬倲有眼油咾吃嘚两盆也吃不落啧是第三桌亇伊盆也要畀我拿过来享受亇。
七点多钟吃罢出来，天厡还亮㕇塰。彝伦园门口头有人塱跳跳民族舞嘞厛，蛮有劲亇。不过我伲不跳，回转宾馆，做游戏！出来旅游，一半乐趣塱外头，一半乐趣塱宾馆。后头両日是日朝夜头邋房间里别相“杀人游戏”。十几年前头读大学汛别相过，现在両个小年轻称佢为“狼人杀”。昰只游戏蛮烧脑子亇，当然一大俦人说说笑笑，嘻哩哈啦，也其乐无穷！就是沉更半夜要惊吵人家“隔壁邻居”也有眼不好意思。 7月10号，大份人全垨㕇宾馆里不出来啧，只有我伲几个人出动，一路朝北，穿过牟定县，到姚安县参观。我一直蛮享受车子上亇观光时刻——横人只要隑㕇塱覅动，但一埭里亇风光尽收眼底。可惜我实在是叫阿土生嘞大老粗，文学素养差，词汇贫乏，独会“赞透赞透嘞灵透灵透”，横近亇塱田，远亇塱山，高亇塱云，路上看得赏心悦目，心情无限舒畅！
到嘚姚安，吃罢饭，参观姚安路军民总管府嘞光禄古镇。古色古香，人也少，笃笃定定，称称心心。轧实交关场许全有一笔丰厚亇文化遗产，只是外头人不大熟悉。佷真亇沉下心来到一垯户荡饶角落子兜下来，只嫌有看头嘚嘞！不过我亇关注点又㕇垯自然界両只物事身上。看见两只金胡虫清白日里就寔恁眠㕇当街路㧙牢定嘚捎来滚去，一群人全拥上去对牢定嘚横拍竖拍，还替佢垯配《动物世界》亇音乐嘞！“&&&&&&&&&&&”滑稽透滑稽透！
古镇兜好，爬山。山上有只龙华寺，横撘上海亇龙华寺名头一样么我也读佢“龙'花’寺”。“华”自古以来就有清音“花”昰只读音亇。不过我对寺庙嘞排呒啥兴趣，虽然一马当先做侦察兵，但里乡转嘚转就出来亇，坐㕇庙门口亇石凳上享受山里亇自然气息，直到还有両个同事嘞导游嘞上来嘚乃么再稍些认真眼参观参观。
下嘚山，望望山顶上亇蓝天白云，想想明朝点要跑啧，实在有眼不舍得。昰个塱是蛮养人亇。出来兜一圈，一个人觉着洒松得不得了！乃呒办法，总贯要回转亇。随佢！先回宾馆弄个両局狼人杀再讲！当然，今夜头肯定要早点歇亇。 7月11号，吃好早饭，上车，动身，一路朝东到昆明，钻进飞机回上海。回转来亇辰光，会飞出浙江海岸线，乃么朝北逐点逐点盘过来亇，朝下有能望着洋山港、东海大桥、临港新城、长兴造船基地。
云南之行结束啧，一路上回味无穷，感慨万千。可能不少人拿昰趟旅游称为“扶贫”，但我不大用昰个词。虽然讲起来，“贫”一般是偏指经济方面亇穷，但发达地区赖以发展经济必不可少亇矿产、能源嘞厛是否就富嗫？好像也蛮“贫穷”㕇塰，乃么昰个辰光啥人来“扶贫”？同样也要依靠交关经济方面贫穷亇地区源源不断亇来输送，不然，引以为傲亇经济何塱来？马上崩坍，难以为继！若然话到西部去旅游、消费是一种扶贫，嗰么朝东部输送资源同样也是一种扶贫——“扶贫”，是相互亇。城乡之间、区域之间、民族之间，全是密不可分亇有机整体。一个国家要强大，内部亇相互扶持、紧密合作是必不可少亇。满族教师张桂梅从东北来到大西南，呕心沥血支撑云南亇教育事业；云南楚雄出身亇彝族战士周国仁长期扎根西藏墨脱，卫国支教靠廿年。还有云南走来亇伟大航海家郑和，就从我脚下亇江东大地上起锚远航，谱写嘚中华民族驰骋世界亇不朽篇章！ 本平台暂未开通评论，大家可至吴语学堂微博留言： 新浪微博：吴语学堂微博 |
