|
上海老底子每天呈送精彩文章一组 打开尘封的记忆，寻觅往昔的岁月
叙上海老底子事 忆上海老底子人 诉上海老底子情 民国时期个上海公营电台作者：赵洁 来源：上海广播博物馆 沪语改写：郭莉 讲述：朱枫 文字、语音审核：丁迪蒙 编辑：王乙其 讲起来，上海是中国广播个诞生地，但是上海浓厚个商业氛围，决定了伊最早个二十年里侪是各种私营商业电台，官办电台最早倒是诞生勒哈尔滨，伊是由地方政权奉系军阀支持创办，1926年10月开播个。当时国民党中央执行委员会个广播无线电台，要到1932年11月12号，再勒勒南京开播，当天，上海各民营电台负责人，还应邀到南京去参加了开幕典礼。
1934年7月，国民党交通部国际电信局发布新闻讲：勒上海新安装了大功率发射设备，搿套广播设备“发音自必清晰远大，除南京中央广播台外，当以此为最大。” 上海国际电信局搿趟是收购了外商个美灵顿电台后加以改建，乃末上海有了第一座由国民党政府部门主办电台——交通部上海广播电台，发射机装勒瑞丰大厦楼浪，播音室勒勒沙逊大厦，就是现在和平饭店北楼。1935年3月9号，电台正式开播，每天分时段用中、英文播出。1937年4月，上海国际电信局又新添一座2000瓦个广播机，可惜还没安装，抗战爆发。“八一三”抗战中，伊也坚持播音，一直到当年11月27号侵华日军强行接管。
跟交通部上海电台开播个同一年，1935年8月，国民党上海市政府宣布，筹建上海市广播电台，目的是为了政令通畅。电台由上海市公用局管理，下设播音组、技术组，所有机件侪是中国无线电业公司负责安装，发射机安装勒市公用局，播音室就放在市政府里向。 上海市广播电台频率900千赫，发射功率500瓦，1935年9月30号正式开播。900千赫从此作为上海官方电台主频率，一直沿用到1958年。作为国民党上海市政府主办电台，开播之前，市府就指令各机关团体装置收音机，开播后又通令市立中小学装置收音机，由教育局负责，勒勒市电台播送教育节目。官办电台既方便了政令传达，又承担了教育职能。抗战爆发后，上海市广播电台勒1937年11月27号也拨日军强行接管。
旧上海还有第三家公营电台——国际广播电台，前身是1940年6月14号开播个德国广播电台，又叫欧洲广播电台，伊是德国政府勒上海个宣传机构，台址勒勒大西路德侨总会，主要播报欧洲情况。迭家电台“内部屋宇宏敞，机件精良，设备完善，堪称沪埠之冠”。抗战胜利后，国民党政府拿日伪时期个上海广播电台搭仔国际电台合并改建了“中央广播事业管理处上海广播电台”，由中央广播事业指导委员会、中央广播事业管理处直属领导，有中波，有短波。每天7点40分到23点30分播出，当中休息两个钟头。 抗战胜利后，各路电台像野草一样野蛮生长，有关方面一再整治，但是有权有势个纷纷假借政军、党、团体名义，开办所谓“公营电台”，像以三青团名义开办个上海青年广播电台，以忠救军名义开办个胜利广播电台，以地下工作者名义开办个久久广播电台，等等等等不一而足。公营电台是勿许做广告个，但是迭眼所谓个公营电台侪勒勒抢占广告份额，广播现象一片纷乱无序，民营电台生计艰难。
1949年5月27号，中国人民解放军上海市军事管制委员会派接管专员，接管了国民党上海广播电台，上海人民广播电台正式诞生。
丁迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
丁迪蒙所撰写的，与沪语相关的著作主要有： 《学说上海话》上海科技文献出版社 《听听说说上海话》少年出版社 《实用沪语》复旦大学出版社 《上海话绕口令》少儿出版社 《上海方言词语使用手册》上海教育出版社 《上海话读成语故事》少儿出版社 《囡囡学童谣》，少儿出版社。
来源：“海上梦叠”公众号 |
|
|
