【沪语悦读】南翔勿光有小笼馒头，还有邪气好吃个罗汉菜（上）

常熟老李jlr5mr 2024-08-29 发布于江苏

展开全文

阿拉老底子每天呈送精彩文章一组

打开尘封的记忆，寻觅往昔的岁月

叙老底子事 忆老底子人

诉老底子情

来源：老有上海味道

作者：沈嘉禄

沪语改写、讲述：朱枫

文字、语音审核：丁迪蒙

编辑：王乙其

十多年前头到南翔古漪园白相一趟，吃顿小笼馒头，倒像煞是桩大事体，要大勤共个。主要原因是路远，费辰光、费力气。后来通仔地铁11号线，讲讲笑笑，呒没几化辰光就到了，比自驾还要便当。

搿两年常庄到南翔老街兜兜，也呒没觉着麻烦，甚至买仔刚刚出笼个小笼馒头，拎到屋里还有点热烔烔唻。

昨日仔上半日又到南翔去，搿趟是南翔朋友请我去品味江南夏季菜个。地铁站出来，蓝天白云，一过天桥，就进入“同温层”个中冶祥腾城市广场，三楼弹眼落睛个一只餐厅就是槎溪·江南隽味。

餐厅开业呒没几化辰光，进入大堂眼睛一亮，设计风格邪气现代，用材讲究，硬装、软装彼此照应，光影变化当中又能带出人搭物个流动感，线条简约，空间宽敞，红搭黑个基调相互呼应，呒没拖泥带水个感觉，青年人侪老欢喜个。

切一片历史个横断面，即使取自近代两百年，南翔古镇也曾经有三秋桂子，十里荷花，烟柳画桥，风帘翠幕，搭十万人家互相穿插映衬，形成了十景或者十八景，搿搭个奥妙，只有南翔报个资深编辑于老师能够讲得出点究竟。

反正，我跟牢仔美女总经理张瑾、趁客人还呒没全部翁过来，参观了各只包房，迭个一间是“鹤湾渔艇”，埃个一间是“天恩赏月”，对过一间又叫“博望仙槎”，全部用南翔十八景命名，每一间还配仔南翔知名画家画个南翔十八景布置成为墙面，坐下来吃茶，一记头置身勒江南水乡个春花秋月、夏雨冬雪当中了。

餐厅以上海本帮菜为底本，但并勿是浓油赤酱一统天下，最让我心动个还是具有南翔风情风味个伊眼菜式，虽然离勿开嘉定府个旧时韵味，但勒一路快跑个城市化进程当中，还是能诱发人们个怀旧情愫个。要感谢槎溪·江南隽味创始人之一个美女老总张瑾，拿南翔十八景元素作为挖掘、研发菜点个文化引导，拿历史搭味觉表达融为一体，食客勒此地用餐，借助美景搭美食个穿插，驰骋一番想象力。

每个人先吃一杯冰镇马蹄甘蔗水，等到冷盆热炒上来之后，于老师搭我讲解了菜品设计意图：侬看迭个一盆，芝士碎洒勒切得细碎个马兰头浪，雪白映衬碧绿，好像江南初雪，槎浦河两岸弥望如玉个树丛，搿道菜就叫“三槎霁雪”；过脱一歇还会得上一款狮子头，浑圆丰润个本色大肉圆，配细长个葱叶，横勒银盘上头，像满月迓勒柳稍，搿道菜就叫“天恩赏月”……而大家刚好勒吃个搿款饮品，入口之后勿觉着甜腻，可以消暑解渴，就像热天介轻轻叫吹过树林里个凉风一样适意，所以也叫“鹓林消夏”。

我对冷菜当中一碟槎溪罗汉菜特别有兴趣，槎溪是南翔个古称，葛末罗汉菜搭南翔应该是有得故事个。迭只咸菜有点像我几年前头吃过个阿婆菜，卖相一般，但咸里向带甜，还带眼开胃个酸味道，自然有勿一样个江南风味。

于老师及时为我补课：罗汉菜学名菥蓂，也叫遏蓝菜，属于十字花科草本植物，因为菜个叶子层层叠叠、像民间社戏里个叠罗汉而得名。南翔罗汉菜是上海嘉定区南翔一带特有个传统腌制蔬菜，其蔬菜品种搭腌制方法相当独特，别个场化是呒没个，也难以模仿。南翔罗汉菜，清新芬芳，味道好，承载仔南翔一代代百姓个温馨记忆，2017年入选上海市嘉定非遗项目。

槎溪·江南隽味个搿只罗汉菜、是买转来之后经过厨师加工调味个，切得细碎，比民间个土制更有一番滋味，实在是搭老酒个好物事。搿能介好吃个罗汉菜为啥勿多产一眼，餐厅除脱仔供应堂食，还可以做成伴手礼个呀。

张总苦笑了，讲：搿只本来是乡间野菜，还呒没成功驯化，葛咾产量勿多，我伲也是通过定点采购弄着一眼，数量有限，维持日常供应，做小包装个条件还勿成熟。于老师补充讲：南翔已经没几化农田了，罗汉菜也勿适宜大面积种植，以前农民是利用房前屋后个边角料种一眼，随便伊野蛮生长。据说现在有了种植专业户，也建起大棚了，2008年，成功生产了第一批瓶装南翔罗汉菜，通过老街浪个土特产专卖店出售，小瓶装个罗汉菜邪气受游客欢迎个。于老师又讲：民国时期从嘉定走出去个外交家顾维钧晚年勒美国生活，特别牵记搿只罗汉菜。