保护传承上海闲话之根——松江方言
阿拉大家侪拉讲上海闲话，上海闲话是上海人讲个地方闲话，上海搿块地方个历史也老长个，假使要寻根，上海是从古代个松江府生出来个。
讲起松江，到今年已经有得1261年建置个辰光了。唐朝天宝十年，也就是公元751年，现在上海地区版图浪向个第一个独立行政建置华亭县设立了。伊个范围，大致相当于现在上海市苏州河以南广大地域。到元朝至元十四年，华亭县升为华亭府，隔一年改称松江府。到了至元二十九年，也就是1292年，松江府东北个华亭县划出五个乡设立了上海县，从此，上海县日长夜大，成为一个大港口，上海县城就成为松江府里向又一个政治、经济的中心。到19世纪40年代，上海开埠以后，就发展成海纳百川的大上海了。所以讲，松江是“上海之根”。
松江作为上海历史文化个发祥地，实际浪向也是上海闲话个发源地。老老早早个上海闲话，就是的的刮刮个松江闲话，老上海闲话通行垃旧松江府个东部，是松江闲话垃拉黄浦江两岸的一个分支。旧松江府个西部，到今朝还存在一个相当大个松江方言区，即今松江、金山、奉贤、青浦（大部分地区），通行松江方言。上海城区个上海闲话垃开埠以后发展变化交关大，但是万变勿离其宗。上海闲话垃变化当中落脱个一点老个语音形式搭仔老词汇，却垃拉松江方言当中仍旧寻得到。松江方言是上海方言追根寻源个腹地搭仔大本营。所以，要保护、传承好上海闲话，就一定要保护好上海闲话个老根——松江闲话。举一个例子讲，专家研究发现，松江闲话里向个入声韵母，是吴语各种方言当中保留得最多最丰富个，也是最可以完整个对应古代汉语语音当中个入声韵个，老法里个上海闲话，搭松江闲话一脉相承。葛咾保护传承好松江闲话，可以理清上海闲话个共时个、历时个演变脉络，可以把握上海地区闲话个基本特征，更可以感受上海闲话个文化魅力，可以传承上海地区闲话个立体个、多样个风采。
阿拉觉着，首先要快点重视起来，市有关部门要拿保护传承松江闲话作为一个海派文化研究个重点课题，成立课题小组，加强比较研究，确立保护范围，着手建库立档。第二是快点寻着传承松江闲话个典型传承人，让专家跟伊拉一道建立松江闲话个发音标准，请传承人用标准个读音录下音来，作为松江闲话个范式。第三应该活跃创作，垃拉沪剧西乡调、沪书、沪语小品节目当中多讲松江闲话，让生动活泼个松江闲话通过文艺个形式焕发出独特个生命力。第四可以向奉贤区学习，垃松江范围里向尝试编写供中小学生了解地方历史文化风物个乡土乡情校本读物，其中用松江闲话编写一定数量个朗读范文，供松江个学生使用。第五是可以创造条件垃拉松江个电台、电视台开设松江闲话时段个新闻搭仔其他专题节目，通过现代化个大众传媒加强传播。
|
|
